立法會足球隊同政府足球隊每年都會對戰，每次政府隊總有問責官員落場做精神領袖。但據聞官場中人最近好頭痛，事關多個「鐵膽」已離開官場。反觀立法會隊就有新血加入，好似之前一連兩場都有入波嘅議員梁志祥，就成為球隊嘅「新靈魂人物」。聽聞好多人都屬意由曾代表立法會足球隊嘅發展局局長陳茂波（Paul）「替補」代表政府隊落場，但未知阿Paul落場嘅意欲如何。
有知情人士話，前政務司司長林瑞麟（林D9）喺去年六月底同官場講再見後，搞到政府足球隊依家剩番嘅「鐵膽」只有民政事務局副秘書長麥敬年等人，其他落場球員就要喺紀律部隊中尋找，但據聞搵來搵去都爭緊個問責官員落場做球隊嘅骨幹成員。
消息指，官場中人環顧新政府問責高官中，據聞最多人推薦阿Paul「替補」落場，事關佢做立法會議員時都曾披甲上陣，一來好熟悉立法會足球隊球員，喺知己知彼情況下可以作針對性部署，相信可以增加贏面。另一方面，相信班立法會舊同僚為免傷及和氣，見到阿Paul落場都會就住嚟踢喎，咁多好處，唔知阿Paul會否願意「捱義氣」落場呢？