政情：高永文分「柑」同味
出名愛潮州食物同功夫茶嘅食物及衞生局局長高永文，原來仲好鍾意食水果。衞生署尋日喺海洋公園舉辦開心果月嘅宣傳活動，搵咗高永文擔任主禮嘉賓，仲即場試食海洋公園最新推出嘅水果盛宴。點知當大會播放大熊貓平日食乜生果時，高局長喺台下非常雀躍，上菜時忍唔住用手機影相。
高永文自爆細細個已經好鍾意食水果，乜嘢水果都鍾意，每次去旅行都會探索當地嘅特色水果，有時連中文名都唔知就試，曾經喺印度試過一款外形似熱情果，但果肉清甜無比嘅水果叫做「Margissa」，到依家都食過翻尋味。但係要佢揀最鍾意嘅水果，始終離不開佢最愛嘅潮州食物「蕉柑」，每年十一、十二月當造，佢都會返鄉下，抬一大箱返香港，有時仲會同好友分「柑」同味添。
囝囝唔似自己乜都啱
不過，高永文笑言囝囝就唔似自己乜水果都啱，佢話呢個情況同衞生署早前做嘅調查好似，唔夠兩成嘅港人每日進食足夠分量嘅蔬果，而且被訪者嘅年紀愈細，食唔足生果嘅人愈多。衞生署今年決定將生果日升格做生果月，希望鼓勵更多市民養成每日食水果嘅習慣。