中環出更：「趙樓神」信中醫撐浸大
浸會大學為九龍塘前李惠利學校地皮同政府僵持不下，除咗校長陳新滋揚言辭職力爭到底外，就連「趙樓神」長實執董趙國雄都加入戰團，下周六以校友身份同浸大學生企街站收集市民簽名，希望得到大眾支持，繼而改變城規會嘅決定咁話。
趙國雄尋晚出席浸大五十七周年酒會，身為浸大舊生嘅佢，當然支持浸大嘅中醫院發展啦，況且佢一直都好信賴中醫，例如有傷風感冒，就會搵中醫把吓脈，遇上筋骨扭傷，就必然幫襯跌打醫師。原來佢近年患上痛風症，成為長期病患，都係依靠中醫治療以防遇上西藥嘅副作用。
反對校園之間建豪宅
佢話中醫藥有長久歷史，係一種好可靠嘅治療方法，就連日本韓國都參詳中藥古方繼而發揚光大。其實香港都有條件令到中醫藥吐氣揚眉，問題係要有地方畀學生臨床培訓，香港嘅中醫先至有得發展喎。佢批評，喺眾多校園建築物之間興建豪宅，不但非常突兀，配套上亦有問題，最好留番畀浸大發展中醫院喎。
卓妮