政情：蔡志明一家喜事連連
「玩具大王」蔡志明旗下鐘錶公司日前舉行廿五周年晚宴，出晒名團結嘅蔡家人傾巢而出。蔡家喜事一樁接一樁，去年次女蔡加怡（Crystal）下嫁設計師老公陳漢聰（Jeremy）後，今年又輪到蔡家孻仔蔡加讚（Karson）於十一月三十日迎娶女友汪圓圓，加上已育有三名子女嘅大女加敏又懷有六個月身孕，難怪蔡太李惠莉笑稱：「真係好開心，等Karson結婚後，就等抱孫喇！」
Karson今年先至廿七歲，分分鐘係城中最早婚嘅鑽石王老五。問Karson點解咁後生就決定結婚，佢真情剖白話，自己係個悶蛋，唔鍾意夜蒲，成日忙住做生意，最近做咗廣西省政協之後更加忙碌，難得女友好了解佢，唔會要求多多，直言呢種老婆好難搵。一句講晒，即係冇「公主病」，想嫁個好老公嘅城中姊妹，收到未？
加讚將娶汪圓圓 生仔隨緣
Karson又話，婚禮完全交由圓圓籌備，佢只需按照劇本喺婚宴當日做個最佳男主角，而婚宴只會擺一日，事關唔想太勞累喎。咁婚後係咪即刻幫爸媽添孫？Karson笑稱隨緣，但母愛爆棚嘅加敏聽到後，即刻催促細佬趁年輕生多幾個，到時一班小朋友就可以一齊玩喇。
當晚待嫁新娘汪圓圓、家姐汪詩詩及父母都有到場，蔡志明一見未來親家，即高興地握手。同場仲有鐘錶界老行尊孫秉樞、鐘錶業總會主席區宇凡及喜運佳常董梁青華等人。好少出席公開活動嘅汪媽媽提起未來女婿就笑不攏嘴，盛讚Karson靚仔又叻仔。卓妮問蔡志明有冇兩句贈畀Karson，點樣做個好老公，佢諗咗兩秒鐘，笑笑口話：仲未諗喎！
卓妮