前白鴿黨副主席狄志遠（Dick）自淡出該黨領導層後動作多多，包括獲政府委任多項重要公職，本身喺基督教香港信義會社會服務部任職副總幹事嘅佢，嚟緊又會「坐正」升任總幹事。不過，阿Dick話今次升職工作壓力大咗之餘，喺財政上亦冇着數，因為原來佢太太一直喺信義會任職老人工作嘅服務總監，為免自己升職後被質疑偏袒，太太會喺完成交接工作後離職，所以家庭收入不增反減。
阿Dick強調，佢同太太一直係信義會嘅教友，佢喺一年前放棄咗手頭嘅幼兒同家長教育工作，加入教會嘅社會服務部，主要都係想服務教會同啲有需要嘅人士，所以唔會計較金錢。至於太太之後會搵番工定係轉做全職家庭主婦，就話暫時未有決定。
對於佢喺早前國民教育風波中力撐特首梁振英（CY）政府同獲委任多項公職，因而被某啲泛民主派舊戰友質疑佢變咗「梁粉」，阿Dick話其實佢同CY根本唔多熟，反而同CY爭做特首嘅唐英年熟啲，事關當年唐唐喺立法局就坐正佢隔籬，雙方到依家都偶有聯絡。佢強調自己一直係憑良心做事，人哋點講佢唔會放上心喎。