政情：李小龍都幫保釣籌款
保釣行動委員會最近接連有好消息，繼早前海事處決定撤銷檢控保釣船「啟豐二號」非法出海後，保釣成員陳妙德、羅堪就同「阿牛」曾健成近日到美加等地籌款時，亦得到當地華人大力支持。有當地保釣人士捐出有李小龍親筆簽名嘅荷里活電影合約，供保釣委員會拍賣作為維修「啟豐二號」嘅經費，估計配合李小龍逝世將近四十周年，可以籌得一百萬港元。
陳燦培割愛供拍賣
捐出呢份珍藏合約嘅係洛杉磯僑領陳燦培，佢後生時曾經率領南加州嘅華僑及留學生，到日本駐洛杉磯領事館抗議，至今記憶猶新，係老牌海外保釣人士。熱愛收藏各類文物嘅陳燦培，幾年前喺美國以數萬美元購入該份電影合約，依家割愛捐贈畀保釣委員會，仲會幫手安排運往香港拍賣，目的都係為保護釣魚島出一分力，認真唔話得。
喺香港同美國長大嘅李小龍出名愛國，生前所拍嘅幾套電影主題，除咗宣揚中國武術外，亦係想幫當年深受外國人歧視嘅中國人出番口氣。陳燦培今次善舉，絕對符合李小龍在天之靈嘅心意。