政情：麥美娟：婚都結唔到點談生育
政務司司長林鄭月娥尋日去立法會特別內務委員會交代政府喺扶貧同人口政策嘅工作進度，唔知呢兩個議題係咪已經講咗好多次，班議員問來問去都係了無新意，仲將話題扯到去夫妻嘅性生活添！會計界梁繼昌（Kenneth）同工聯會麥美娟（Alice）同樣關注近年生育率低，話歸根究柢係因為工作壓力大兼工時長，搞到剩女遲遲未嫁得出，而夫妻亦冇時間享受性生活喎！
林鄭聞言笑咗出來
Kenneth話，唔少會計界選民向佢反映，喺香港工作壓力太大，好多夫妻根本冇時間享受性生活，問政府有冇改善方法喎。緊隨其後發言嘅Alice就話，標準工時可以減低僱員工作壓力，增加夫妻嘅生育意欲。不過，佢突然爆出一句：「標準工時對未婚女性仲緊要，婚都結唔到，講咩要生育呢個問題呢？」佢似乎講緊自己咁喎。
聽到佢哋兩個咁講，林鄭當堂笑咗出來，話生育係個人選擇，佢都唔知點樣先可以令啲夫妻生多啲小朋友。佢又透露，唔少朋友向佢反映，組織家庭生小朋友有好多負擔，所以寧願揀養寵物，佢又話中央政策組會研究其他國家嘅經驗，睇吓可以點樣吸引更多人生仔喎。