政情：林健鋒握手握到傷
釣魚島問題令中日關係劍拔弩張之際，立法會議員林健鋒（Jeffrey）尋日就同一班日本商界人士開咗個港日經濟合作會議，唔知係咪因為兩國關係緊張，定係純粹日本人太熱情，大家握手時亦都緊張兼大力，搞到Jeffrey隻右手手腕傷咗，有啲隱隱作痛，要喺手腕貼藥膏布。Jeffrey後來自爆，原來佢席間問過人哋有關釣魚島問題。
質疑日本對華態度
話說會議本來係討論港、日經濟合作議題，但Jeffrey竟然膽粗粗去同人討論釣魚島呢個咁敏感嘅話題，佢質問話，日本政府一方面要同中國經濟合作，但一方面喺釣魚島問題上又咁強硬，咁即係點喎？雖然Jeffrey話有與會嘅香港商界人士讚佢叻仔，問得好，但日方嘅隨團主席就以呢個係政治問題，建議討論番經濟問題來轉移視線。
個會議本來係討論經濟合作，但Jeffrey竟然膽粗粗問人釣魚島嘅嘢，對方點諗真係好難講。不過，Jeffrey同人握手應該喺開會前，照計佢未問到釣魚島嘅問題，睇怕佢手痛都係握得手太多啫。