政情：「毛」事生非 猛遭圍插
香港電台近年風波不斷，最近更傳出內部編採自由懷疑被干預，曾經做過港台主持嘅立法會議員毛孟靜尋日就喺立法會內務委員會提出動議，要求引用《權力及特權條例》成立專責委員會，調查廣播處長鄧忍光涉嫌干預港台編輯自主一事。結果被建制派議員圍攻，鬧佢無事生非之餘，就連泛民議員都叫佢收回動議，毛孟靜最後被迫撤回動議，白白浪費咗內會共一小時零八分鐘時間。
王國興：應尊重總編輯角色
毛孟靜喺發言中點名要求工聯會撐港台工會，工聯會王國興於是率先發炮反對動議，話鄧忍光已經喺員工大會上清楚交代事件，應該要尊重鄧忍光作為總編輯嘅角色。佢又話，事件發展至今應該畫上句號，不應再無限上綱，又話如果立法會介入事件，只會小事化大，於事無補。新民黨葉劉淑儀就話《權力及特權條例》係立法會嘅尚方寶劍，唔應該輕易運用，又話事件只屬政府部門一位員工同處長嘅糾紛，立法會毋須介入。
議員鍾樹根亦狠批毛孟靜「無事生非，無事搞事」，話今次事件同數碼廣播電台發生股權變動一事如出一轍，當時泛民都口口聲聲話要調查事件，「政治迫害」、「西環干預」等四字詞語乜都出齊，但到頭來成件事只係商業糾紛，有人收咗錢即刻冇聲出。鍾樹根話，雖然立法會議員有唔少特權，但亂用就會造成白色恐怖，又話只要員工同管理層坦誠溝通，好多誤會就可以得到解決；議員謝偉俊亦鬧佢無事搞事。
可能泛民自知投票一定會輸畀建制派，為免動議被否決後唔可以再提，於是勸毛孟靜改為去信要求資訊科技及廣播事務委員會召開公聽會，邀請鄧忍光同港台員工等相關人事出席交代事件，如果不得要領先再算。眼見自己友唔幫手，毛孟靜惟有縮沙撤回動議，再被建制派議員投訴佢浪費時間同公帑。