中環出更：陳鄭玉而叉足電接棒
仁愛堂下月中換屆，將卸任嘅主席黃達東（Dennis）日前喺酒店舉行告別派對，感謝一班兄弟姊妹出心出力，佢好有心思，用每一位堂友嘅名字作咗首詩送畀對方。候任主席陳鄭玉而（Connie）笑言心情好輕鬆，早前已飛加拿大度假三周，叉足電先接任，未來會盡力而為，重點係關注單親家庭援助。
本身再婚嘅Connie坦言係過來人，明白到社會支援單親家庭係好重要，近年離婚率勁升，引伸出多項社會問題，佢好希望為單親家庭提供適切支援，咁就家和萬事興喇。該堂每年都會舉辦「極地之旅」，帶領一班學生考察，Connie透露今年會到東非肯尼亞睇野生動物。
傳發叔次子做仁愛堂總理
仁愛堂係多年前由鄉議局主席劉皇發所創立，長子劉業強都做過主席，據聞下屆新增嘅十多位總理中，發叔次子劉業光都榜上有名。據聞劉業光現職公立醫院嘅骨科醫生，行蹤一向低調，之前發叔已經多次叫過佢加入仁愛堂，今次終於答允，仲話未來可能為該堂義診添！