中環出更：他信疑似再遊港八百萬名車代步
香港認真多貴客，上月底泰國總理英祿（YingLuck Shinawatra）啱啱帶埋囝囝訪問香港，仲話唔會同流亡海外嘅哥哥、即前泰國總理他信（Thaksin Shinawatra）見面，但轉個頭，環遊四海嘅他信又疑似現身香江。尋日下午大約三點，有本報忠實讀者報料話，他信同埋男性友人由尖沙咀「富豪飯堂」行出來，他信笑容滿面，睇嚟心情唔錯，登上灰色豪華房車離去。
尋日讀者見到嘅疑似他信，代步嘅靚車好唔簡單，係以製造頂級豪華房車聞名嘅德國Maybach，價值高達八百二十多萬元。去年五月，卓妮曾經撞見他信偕友人喺尖沙咀歎下午茶，當時用以代步嘅只係豪華七人車，點解今次漫遊香江，換咗架咁名貴嘅豪華房車呢？
何平仙係登記車主公司董事
翻查有關豪華房車嘅資料，車主登記係「Crown Horizon Limited」，公司董事係何平仙（Ho, Robert Ping-Hsien），同泰國卜蜂集團（內地稱「正大集團」）海外財務長何平仙同名同姓。卜蜂係泰國最大嘅商業集團，由華人謝易初兄弟創辦，集團最近最轟動嘅投資係豪擲七百二十七億港元，接手滙豐控股持有嘅平安保險股權。
卓妮根據讀者提供嘅相片，疑似他信登上房車嘅後座左邊座位，而登上右邊主家位嘅男子，同謝家第三代接班人謝吉人好相似，唔知係咪由佢親自招呼他信呢？如果係真嘅話都唔出奇，話晒他信都係泰國華裔移民第四代，大家身在他鄉，互相照應好應該嘅。
卓妮