亞公岩貨車違泊阻交通
「成日都有貨車泊喺路邊塞住晒，但從來都唔見有警察嚟巡，搞到愈嚟愈多車泊喺度！」李小姐指筲箕灣亞公岩村道長期有大型貨車違泊，嚴重阻塞通道，巴士間中亦難以駛過。李直指情況已持續多時，亦曾多次投訴均未有改善，要求警方加強執法及檢控違例者，以儆效尤。
搞到出唔到車
當區區議員杜本文亦證實曾接獲相關投訴，「街坊都係話啲違泊車塞住咗村口，搞到出唔到車，最大問題都係阻住咗視線！」杜本文要求警方加緊留意上址交通情況，防止違規問題進一步失控。
警方發言人承認，柴灣警署過去一年共接獲三十七宗上址違例泊車投訴，期間共發出七十一張定額罰款告票。發言人強調，會繼續密切留意上址情況，一旦發現有車輛違例停泊，將採取票控行動。