國務院總理李克強首度以總理身份舉行記者會，唯一提到香港問題嘅記者，就係嚟自鳳凰衞視嘅胡一虎，但係佢提問嘅開場白立即引起網民圍插，話佢擦鞋。事緣呢位曾獲選最性感男主播嘅胡一虎話留意到李克強打手勢超過三十次，令佢諗起十一年前採訪過仲係河南省省長嘅李克強，胡一虎仲大讚當時嘅總理展現出「自信同睿智」，又話自己同李克強都係安徽人，其實佢係想問，李克強上次來港派「禮包」，仲會唔會有呢個措施。
無論係內地定香港網民，都對胡一虎嘅「提問」劣評如潮，批評佢一開始已經攀關係兼擦鞋，忘記晒記者要提問嘅天職。
內地網民亦睇唔過眼，覺得胡一虎浪費晒寶貴嘅發問機會，話鳳凰衞視搞到自己喉舌機構咁款。有香港網民話好彩呢次係鳳凰衞視，唔係真正香港傳媒發問，因為鳳凰衞視只係一間設立在香港嘅媒體，唔算係真正港媒。
此外，有美國《紐約時報》記者亦投訴，佢哋未獲中國政府嘅邀請，參加尋日場記者會。有個講法話，自從《紐時》早前披露溫家寶家族財產狀況後，《紐時》喺內地採訪已變得困難重重，唔知呢次《紐時》被禁入場，是否與上述有關。