政情：林鄭變咗署理「港督」？
香港人時興緬懷過去，好多嘢都要等到冇咗先嚟珍惜，好似距離西貢碼頭約十五分鐘船程嘅鹽田梓，百幾年前因盛產海鹽而風光一時，但隨着行業式微，鹽田梓自九十年代起沒落荒廢。近排有村民忽然諗起要「尋根」，更成立保育中心恢復鹽田昔日面貌，佢哋尋日就搵咗政務司司長林鄭月娥，及同為鹽田梓村民嘅天主教香港教區陳志明副主教出席復修工程動土禮。
不過，主持儀式嘅女司儀唔知係咪太過懷緬過去，期間竟脫口稱呼「署理特首」嘅林鄭為「署理港督」，言論一出頓時全場嘩然，好彩見慣風浪嘅林鄭定過抬油冇有怕。相信呢位司儀食咗豹子膽都唔敢公然搞港獨，但係香港已經回歸十五年，「港督」呢個過氣稱謂要改喇！
講番呢個「翻生」鹽田梓計劃，負責計劃嘅鹽光保育中心今次斥資六百萬元，復修島上三分之一面積嘅鹽田，預計九月竣工，十月開幕，中心希望透過開放鹽田，畀本地學生親身體驗產鹽嘅原始樂趣。由於中心係非牟利機構，因此只會力求收支平衡，絕對唔會因為求財而過分發展鹽田梓。