政情：請客開公數 貪曾充闊佬
貪盡海陸空嘅貪曾曾蔭權出晒名孤寒，任何時刻都算死草、諗縮數。佢咁嘅脾性，政府裏面相信都無人唔知。最近我哋又收到風，大爆貪曾疑用公帑大排筵席當係自己請嘅醜事。話說一○年貪曾高調帶領一眾高官「起錨」宣傳二○一二年政改方案，最終政改獲得通過，之後貪曾竟然主動話要請一眾政府官員食飯。正當大家都驚訝點解貪曾忽然闊佬，原來貪曾又喺度出屎橋慳荷包。請幾十個同事食飯不知幾有體面，原來佢用納稅人嘅錢為自己面上貼金。
當年貪曾勞師動眾，出動晒政府大大小小嘅官員，拍完短片又頻頻落區宣傳，幾咁大陣仗。當時各方都唔睇好方案可以喺立法會獲得三分之二議員通過，點知全部跌晒眼鏡。據聞當時貪曾成個凱旋回歸嘅勇士咁款，不知幾咁興奮，即時轉死性拍晒心口咁話，要好好慰勞一班喺「起錨」行動中有血有汗嘅政策局成員，喺跑馬地馬會會所請食自助餐。大家都知道貪曾不嬲都愛財如命，今次又點會咁好死自掏荷包請食飯呢？
到咗飯局當日，謎底就不攻自破喇。話說貪曾邀請嘅七、八十個來自政制及內地事務局、民政事務局、律政司、新聞處等部門嘅官員到場，佢哋發現席間竟然有幾個非政府架構嘅街外人同場出現，呢幾個人同「起錨」行動冇乜關係，極其量只係幫過一兩次手搞活動。呢次飯局本來只有政府內部人士知悉，外人基本上冇可能會知道，就算知都冇可能會畀佢入場。
邀外人出席 變相唔使自己畀
於是大家進一步猜測，貪曾咁識得鑽政府規矩嘅空子，一定係知道倘若淨係請同事食飯，冇得開公數，但只要請多幾個外人，將飯局嘅性質改為「請客」，條數就可以理所當然咁動用公帑嚟找，自己就可以一個仙都唔使出。唔怪之得當日貪曾話請食飯，講得咁口爽啦！大家餐飯食得高高興興，之但係背後就喺度竊竊私語，唔知同事們同佢講「多謝」嘅時候，佢好唔好意思嘅呢？