中環出更：「撈底王」籲防樓股危機
今年投資氣氛詭異，樓市、股市欲升還跌，散戶睇唔通透，容乜易損手爛腳。日前卓妮見到有「撈底王」稱號嘅金融界元老兼慈善家李和聲，梗要問佢贈兩句。佢話，現時香港投資環境「好唔正常」，無論股市或樓市都有危機，呼籲散戶要加倍小心。
經濟不景戰績彪炳
早前上海總會喺中環會所與過百名中文大學內地生歡聚。永遠榮譽會長李和聲講起佢多不勝數嘅撈底戰績，佢好輕鬆咁話，十年前沙士爆發時，佢主張斥資三千萬元購置兩層會所，結果依家市值點止三億元，「撈底王」果然名不虛傳。李和聲係港交所前身聯交所嘅創會理事，亞洲金融風暴時，港府首次入市對抗國際炒家，佢間證券公司都被徵召為外匯基金打大鱷嘅股票行之一，喺金融界享有一定地位。
上海總會理事長王緒亮都在場，佢話廿年前總會捐助中大創辦上海總會科研技術中心，自此與中大關係緊密。十二年前推出《家在香江》計劃，為中大內地生提供獎學金及生活支援，至今已培養好多優秀人才。