中環出更：名人教仔心得：勿逼得太緊
呢兩日連環發生子弒父母倫常慘劇，身為家長嘅聞訊無不心酸。尋日沙田馬場舉行盛大盃賽，卓妮見到愛沙尼亞駐港名譽領事林建康（Matthew）同太太黃寧艷拍住拖入嚟湊熱鬧，講到教仔心得，育有兩名乖仔嘅佢哋同聲話，千祈唔好強迫小朋友去做唔喜歡嘅事，但不妨鼓勵佢哋多嘗試新事物，發掘個人興趣。
林建康：忌開口就教訓
林太憶述，以前都曾經逼過大仔孝勇學電子琴，自己仲「陪太子讀書」學埋一份，無奈學咗成年，囝囝都提唔起興趣。佢話，初初對住愛兒好勞氣，後來都放鬆心情，畀囝囝另覓嗜好，母子感情反而更進一步。Matthew話，同子女溝通，切忌一開口就教訓，畀佢哋發吓牢騷先，並代入對方嘅角色諗，溝通就冇難度喇。
中華電力企業發展總裁莊偉茵（Quince）同老公黃楚權十指緊扣現身，同樣有兩個囝囝嘅佢話，愛用老子嘅「無為而治」教仔，即係畀足夠空間佢哋發展，但前提係唔可以偏離「尊師重道」嘅原則。Quince坦言，自己工作繁忙，陪囝囝嘅時間比較少，但係佢認為教育子女唔係在乎時間嘅多寡，而係質素，所以佢兩夫婦都好重視身教。
前行政會議成員兼中信泰富前董事總經理范鴻齡尋日都有入場，佢話嚟撐老友馬會副主席葉錫安嘅愛駒「藍雪山」，該駒最終跑第三。全國政協、港協暨奧委會主席霍震霆（Tim）都有到場，問Tim幾時抱孫，佢笑騎騎咁答：「你去問啲細路啦！」卓妮都希望快啲有好消息。
卓妮