政情：泛民勾結「外國勢力」？
立法會議員足球隊尋日同一班外國駐港領事代表踢咗場友誼賽，多名報咗名會出戰嘅泛民議員喺開波時集體甩底，剩低五名建制派議員包括曾鈺成、梁志祥、陳克勤、何俊賢（高佬賢）同郭偉強加埋班外援落場，其中遲大到嘅唯一泛民隊員「長毛」梁國雄，更加差啲擺烏龍幫咗領事隊入波。所以呢，話泛民勾結外國勢力，都唔係話冇根據o架！
剩低5建制落場贏4：2
議員隊同領事隊尋日相約小西灣運動場開戰，但泛民議員胡志偉同莫乃光等都臨場甩底，幸好餘下五名「愛國愛港」嘅建制派議員，無喺「八國聯軍」面前失威，其中高佬賢開波五分鐘就入咗第一球，可惜之後佢唔小心仆咗落地，撼親個頭，搞到「短暫失憶」要抖一抖，仲畀人笑佢人因為生得高，個頭撞落地係會傷啲。
踢足全場都無索氣、腳法老而彌堅嘅梁志祥，之後又入多一球，係佢連續兩場為議員隊入波，加上外援入嘅兩球，議員隊最後以四比二戰勝領事隊。
不過全場最矚目嘅，要數喺下半場先加入嘅長毛，佢一入場就帶住個波係咁衝，如入無人之境，皆因佢衝向嘅係議員隊嘅龍門，幸好有人醒水中途截咗佢個波，唔係就失禮死人喇。