政情：馬唯中淡妝步入酒店
本報尋日獨家報道台灣總統馬英九的女兒馬唯中，前日喺堅道寓所遊小巴河去香港大學美術博物館參觀後，尋日又發現佢由堅道寓所行路到中環港鐵站，然後搭港鐵去灣仔萬麗海景酒店。早上十一時許，馬唯中離開寓所，見佢依然一身簡樸服飾，身穿黑色衫配牛仔褲，但比前日多咗條黃色圖案嘅絲頸巾，而且明顯化咗個淡妝，莫非係約咗愛郎蔡沛然或好朋友去酒店食午飯？
禮貌回應記者
馬唯中由堅道寓所行落中環港鐵站期間，沿途有唔少市民圍觀同用手機向佢拍照，但馬唯中全程並無回答任何提問，但就好有禮貌多次講：「謝謝！你們辛苦了！」大約行咗十五分鐘，終於到達中環港鐵站，見佢好熟悉咁行到八達通卡增值機增值，然後入閘。搭咗兩個站之後，馬唯中就喺灣仔站落車，向會展方向行去。大約十二時左右，馬唯中行入萬麗海景酒店。直至下午三點半，佢先至獨自返到堅道寓所。
