政情：區會巨款恐一場夢
施政報告提出向十八區區議會撥款廿億元做「社區重點項目」，泛民一直擔心計劃會推行「蛇齋餅糉」式活動，搞到當局要將區議會提交項目建議嘅死線，由三月底押後至暑假，望趕及十月新立法年度立會復會後闖關申請撥款。不過，倘若泛民又玩「拉布」，恐怕令相關項目「爛尾」收場，睇怕撥款程序一日未過關，有份睇實項目嘅「騰雞美華」民政事務總署署長陳甘美華真係有得震無得瞓！
料「分拆上市」申撥款
現時十八區區議會大部分由建制派主導，泛民金睛火眼睇實「社區重點項目」，避免有機會成為下屆區議會選舉嘅政治籌碼。泛民除咗計劃喺區議會同立法會層面討論再討論外，據聞有個別人士打算用「拉布」作為「秘密武器」，官場中人見狀都不敢怠慢，幾乎定時定刻評估「被拉布」嘅可能性，又準備以「分拆上市」嘅方式向立法會申請撥款，包括二億元項目可行性研究及十八億元項目撥款。
消息指，港府嘅良好意願係計劃趕喺本立法年度完結前，即今年七月中前先申請二億元可行性研究撥款，然後喺暑假期間收集各區議會嘅項目建議，等待立法會於同年十月復會時，盡快排隊向立法會工務小組及財務委員會申請餘下十八億元項目撥款，目標最快可於明年首季或年中開始就工程項目動工。其實當局心急之餘，相信各區議會更加心急，擔心如果項目有乜差池，都唔知點向市民交代。
事實上，港府呢個如意算盤係咪打得響，冇人有魔術棒預早知道，但有人估計泛民必定會以監察公帑運用為由逐項拆出來審議，加上「拉布」陰霾揮之不去，如果每個關卡拖番兩、三個月，希望喺二○一五年底前完成所有項目幾乎係不可能嘅任務，最壞打算甚至係有啲項目會「爛尾」收場。究竟「社區重點項目」會否成為泛政治化嘅另一犧牲品，大家要密切留意事態嘅最新發展喇！