中環出更：鄧慶治 史立德投得心水馬
本年度最後一次馬匹拍賣會尋日舉行，吸引好多城中名人出席，包括中華廠商聯合會常董史立德（Allen）、佳能（香港）高層鄧慶治（Mingo）及康泰旅行社創辦人黃士心等。今次Mingo有備而來，第一口價就跳上三百萬元，結果以三百二十萬元成功投得心水馬匹。Mingo話，因為其所屬賽馬團體嘅馬匹退役，需要新馬匹補上，所以今次志在必得，佢對成交價都好滿意，事關已經低過預期喎！
撞正Allen牛一 一擊即中
至於Allen投馬係無心插柳，佢從來未試過喺香港投馬，原本入場只係趁吓熱鬧，但突然醒起，去年買咗匹馬送畀囝囝Kenneth，但係寶貝女兒史佩加（Kathleen）仲未有馬，加上尋日呢匹心水馬同囝囝名下嘅靚駒屬同一馬種，所以佢心血來潮舉手競投，點知冇人出價，佢一出價二百五十萬元就成功投得喇，咁啱尋日係Allen生日，認真夠運。