貪曾滾出禮賓府後，七年禍港唯一成就就係練成「權力慣性」，點解咁講？好簡單啫，佢因貪腐醜聞，緣絕全國政協副主席後，乃以高姿態「巡遊」江蘇，內地網民直擊貪曾在大批內地官員陪同下，巡遊高淳老街，當中更包括「跨省」緊隨嘅廣東官員！
新領導人不久前才高叫話要「清新政風」，其中一項強調「不安排群眾迎送，不鋪設迎賓地氈，不擺放花草，不安排宴請」，如今貪曾出巡江蘇，早前更出遊南京著名景區梅花山，但見佢手執兩部貴價專業數碼相機，四處亂影，照舊有多名西裝骨骨疑似內地高官及公安人員緊隨，勞師動眾招呼呢位已下台嘅「香港第一貪官」！
講出來都真係好鬼諷刺，貪曾接受內地男士雜誌訪問，話佢離任後最惦記是禮賓府的廿多條錦鯉，又自爆當年豪花三十萬公帑建的魚池係恒溫池，一到冬天就會加熱；各位，貪曾禍港時代嘅禮賓府，每月電費高達二十萬，足足係一個普通家庭嘅二百倍，如今大家知點解喇！
貪曾「治」港，一味吹水，另一味用盡權力，舔盡着數，佢話「做好呢份工」確認真刺耳，但見佢下台後依然死性不改，發揮權力慣性；可恨內地官員招呼佢參觀梅花山；大哥，梅花嘅高潔形象，冰心鐵骨，睇怕都會受到污染！計老朽話，貪曾最啱參觀近日有逾六千頭死豬漂流嘅上海黃浦江；咁鍾意影相嘅佢，最啱拍一輯「死豬奇幻漂流之旅」！
貪曾面皮夠厚，所謂「死豬不怕開水燙」！觀梅花山又點及觀黃浦江千豬漂流咁啱佢性格呢！當然，貪曾觀望幾千頭死豬漂流時，說不定會吹口哨唱「上海灘」，之不過，呢幾句更啱佢發揮：讓海風吹拂了五千年，每一頭死豬，彷彿都丟掉你的尊嚴，讓海潮伴我來保佑你，請別忘記，那永遠不變死豬的臉！