去年立法會超級區議會選舉，劉江華得票低得離奇，最終要脫離議會生涯，好彩最後執番個桔做副局長。點解劉江華咁低票，而民協馮檢基又可以咁高票呢？到依家都流傳好幾個版本。最新嘅講法係，原來一班鄉事派不滿民建聯（民記）太霸道，次次選舉時都要鄉事派抬轎，所以班鄉事派就將怨氣放喺劉江華身上，選舉前最尾一刻，寧願灌票畀阿基，都唔益民記。
據知情嘅鄉事派人士話，新界人一直對民記不滿，覺得佢哋有事先搵鄉事派幫手，平時又唔肯撐新界人。去年選舉期間，仲叫佢哋動員投劉江華，所以部分鄉事派惟有搵劉江華「祭旗」，實行陽奉陰違，表面應承動員投票，但暗地裏卻投畀阿基。據聞元朗、十八鄉同沙田一帶嘅鄉事派，都動員新界人投畀阿基，夾夾埋埋最少都有四萬幾票。
其實鄉事派一早想借其他人挫民記銳氣，所以當初超級議席提名期時，無喇喇有十幾名鄉事派提名白姐姐參選，只係後尾覺得白姐姐難成大器，先至搵其他人代替。不過，點解鄉事派會益阿基呢？原來九十年代阿基經常撐新界原居民，好多新界議題都有出聲幫手，所以新界人最後關頭還番呢個人情。