政情：烏龍拖稅「失威」
保衞香港自由聯盟尋日喺中環開設街站，呼籲市民參與不合作運動，喺繳交第二期稅款時少交十蚊，以表示不滿政府施政。聯盟成員之一嘅立法會議員范國威（Gary）就自爆佢的而且確有響應聯盟號召交少十蚊稅，但係佢就懵盛盛，喺第一期交稅嗰時經已交少咗十蚊，於是被稅務局打電話問佢係咪交錯稅。
Gary就好坦白話係刻意交少啲稅，但聽到稅局職員一頭霧水，惟有同Gary講第二期稅要罰多三百幾蚊，仲話會發信畀Gary叫佢盡快清還喎。
當局籲勿以身試法
不過，Gary話喺下月交第二期稅嘅時候，將會照辦煮碗交少十蚊稅，抗議政府罔顧民間訴求。
佢仲話，為咗檢視活動成效，將會喺七月前喺立法會提出質詢，要求稅務局提交資料，睇吓有幾多市民響應活動喎。
根據《稅務條例》第112章，如果市民冇依足應繳交嘅稅項，就會被視為拖欠稅款，稅務局局長可以即刻根據《稅務條例》第 XII 部嘅規定採取法定追稅行動， 包括徵收百分之五附加費、向僱主在內嘅第三者發出追收稅款通知書，或用法律行動收番筆稅款，奉勸市民真係唔好以身試法喇。