政情：塘邊鶴幫范太解畫

全國人大會議尋日選出新一屆人大常委，范太得二千七百九十張贊成票再度當選，而反對同棄權票各有一百二十四票同廿七票，其中反對票同棄權票都分別較上屆多咗。還記得○八年范太首次當選人大常委時，以二千八百九十六票贊成，四十二票反對，十票棄權，得票率高達九成八，但事隔五年後，角逐連任嘅范太得票竟然「不升反跌」，俗語有話事出必有因。

范太自言繼續發聲

范太事後承認非高票當選，估計可能同自己嘅言論唔係好啱聽有關，但自言會繼續發聲，唔會為咗要令大家開心，甚至係討好有選票嘅人而就住嚟講，因為佢過唔到自己嗰關喎。儘管范太打開心扉直認反對票增加同自己年紀，甚至乎係同自己言論有關，但范太嘅人大同袍都爭先恐後為佢反對票增多「解圍」。

身兼行政會議成員嘅港區人大羅范椒芬話，范太較上屆多反對票同批評特首梁振英無關，又估計部分人大投票時，傾向剔走年紀較大嘅候選人。另一名行會成員鄭耀棠就認為，范太五年前首次當選時，好多人大都未認識佢，不過五年過後有較多人認識范太，自然會有較多意見喎，因此而投反對票都未定。

不過，要數最有創意嘅解讀，一定係人大新丁、新界社團聯會理事長陳勇，事關佢解讀范太嘅得票同「限奶令」呢個嚴厲措施有關，內地市民同網民有啲反應比較大，所以有啲人大代表就作出「呢個表達」。就大家嘅解讀嚟睇，班港區人大都幾團結，槍口一致對外，完全合乎京城依家吹嘅「大團結」號角。