立法會會議廳素來有個不成文規定，就係議員只可以用枱面上嗰隻玻璃杯飲水，唔可以自攜有色飲料入內。
不過，由於今屆立法會有接近半數係新丁議員，懷疑有人唔熟悉，以為可以帶暖水壺入去開會，久而久之，有人仲會喺暖壺內裝啲紅棗水、柑桔蜜等潤喉兼濃味飲品，違規情況愈嚟愈嚴重。
立法會行政管理委員會早前就開會傾呢件事，提醒議員要自律，唔好再帶暖壺同暖杯入去會議廳開會，又話議員如果想飲水可以叫議會管事斟水。咁又係嘅，如果開會准許議員自攜飲品入內，分分鐘連酒精飲品都有人帶入去，到時飲大兩杯亂噏廿四就弊喇。
有議員透露，上屆立法會議席出缺機制拉布戰期間，唔少議員都會自攜飲品帶入會議廳開會，以抵抗睡魔，好似工聯會黃國健就會沖定杯普洱茶傍身。當時因應呢個特別情況，主席曾鈺成就採取「隻眼開，隻眼閉」嘅態度。不過依家已經事過境遷，睇嚟各位議員都係時候尊重番議會傳統，飲其他飲品就要行出會議廳喇。