前幾日舉行嘅沙田區議會田心選區補選，民主黨（白鴿黨）丁士元輸畀公民力量潘國山輸足幾條街，認真羞家。新民主同盟一班區議員尋日同傳媒聚會時，都有傾呢單嘢，召集人鍾錦麟話，一早知道該區嘅建制派安全系數好高，只不過估唔到白鴿黨得五百幾票咁少，實在大跌眼鏡喎。
新同盟一早估到白鴿黨會輸到七彩，因為白鴿黨喺區選只懂打政治牌，而街坊只想要一個幫到手嘅「區保」。所以去年立法會選舉，白鴿黨劉慧卿喺田心選區攞到七百幾票，但今次丁士元連呢七百票都冇，就係咁解喇。唔知白鴿黨高層，今次聽唔聽得入耳呢？
其實泛民都知衰，知道二○一五區議會選舉有好大隱憂，分分鐘會全軍覆沒，所以最近幾大泛民政黨已經圍埋商討「協調機制」，以免出現撞區情況，自己人打自己人。
不過，新同盟就未肯加入協調，佢哋認為要打破舊有傳統，如果舊人連續兩次喺區選落敗，就應該要讓路畀其他泛民政團，或者加入民調分析邊位泛民最大勝算。實情泛民政黨之中，都係得白鴿黨候選人輸完又輸都依然繼續參選，所以新同盟今次似乎係瞄準白鴿黨開火囉！