《中國模式國情專題教學手冊》去年引發嘅國教風暴，搞到第四屆政府啱啱上場，櫈都未坐暖，就要應付咁大場政治風波，真係多得出版呢本手冊嘅國民教育服務中心唔少。呢個中心喺楊耀忠任會長嘅香港教育工作者聯會屬下，因為國教，教聯會屬下另一間中心面臨不獲教育局再續約嘅危機，中心近日積極去信學校爭取支持，希望再獲當局續約同資助。
因為國情手冊風波，該中心去年已被迫暫停服務。不過，另一間位於大埔嘅中心同教育局簽訂嘅服務合約將於今年六月底屆滿，中心上星期發咗一張通告同問卷畀多間中學、小學及幼稚園校長，講咗一大輪自誇同客氣嘅說話，講到底，其實咪要求學校支持中心同政府續約囉。
咁高調游說學校，一定係中心自知要續約有相當難度。不過反國教嘅團體當然好憂慮啦，因為國民教育服務中心就等如國教，就等如洗腦，好簡單，好盲目，政府同佢哋續約，咪即係要考驗吓政府上場之後半年對付「反洗腦」浪潮有無進步？照計都無咁嘅需要喇啩。教育局嘅官式答案就話，當局會先研究學校對服務的需要，但暫未有具體時間表。