「貪曾」前特首曾蔭權爵士冇得做政協副主席，睇怕連佢自己都眼冤，一於出外享受免費旅遊搵吓着數。貪曾繼早前被發現勞師動眾到廣東辦年貨及遊玩後，上星期四佢又出現喺江蘇省高淳老街，點知今次仲大鑊，竟然有廣東省港澳辦及接待辦官員「降格」陪住貪曾呢個退休「舊電池」貪官，係咪犯賤呢？咪忘記呢班官員係跨省公費旅遊，腐敗及浪費公帑惡行同貪曾有乜分別呢？同中央新領導班子提倡廉潔節約大唱反調，好應該認真查辦。
微博今次再踢爆貪曾跨省遊蹤嘅新消息，今次團友除咗貪曾兩公婆外，仲有廣東省接待辦副處長、省港澳辦及高淳縣委書記、縣長等人，浩浩蕩蕩一行人，十分壯觀，唔使問又係前呼後擁，專車開路，搞到非常擾民啦！貪曾鍾意周圍玩、搵着數就算啦，點解地方官員都要跨省陪玩、陪住佢癲呢？內地成日話要打貪腐，又話要杜絕浪費公帑，但係又放任地方官打着接待香港退休「舊電池」嘅幌子，趁機遊山玩水，官官相衞，天理不容。
轉個頭，貪曾夫婦尋日又飛咗去台灣，此行神神秘秘，只係聽聞佢會去探親及到台南等地參觀。話就話今次係私人訪問行程，但係台灣陸委會港澳處就安排專人招呼佢，仲要給予特別通道禮遇通關，聲言係基於「禮遇、尊重、便利」嘅原則及人道需求喎，人哋都講到咁，睇怕又係貪曾要求多多啦，認真唔知醜。