政情：吳得掂 清理貪曾蘇洲屎

新朝上場要撥亂反正

去年本報揭發貪腐醜聞不絕嘅貪曾，喺當年藉推動教育產業為名，未經公開諮詢，就以賤價一千元批出屯門掃管笏一幅市值十四億元嘅背山面海靚地皮，予英國貴族學校哈羅作為校舍之用。哈羅其後更獲政府批出二億七千幾萬元免息貸款興建超豪校舍，結果惹來非議，新民黨葉劉淑儀當時更點名炮轟貪曾唯利是圖，令本地教育產業「只有軀殼而冇靈魂」。

隨住貪曾去年下台，加上由佢一手催生嘅教育產業備受爭議，新政府上場後就嘗試撥亂反正，好讓教育界休養生息。就係因為咁，皇后山地皮預留作發展高等教育用途時都顯得步步為營，絕對唔容許再有類似明益外國辦學團體嘅醜聞發生。政府明白興建外國貴族私校無助本地教育普及化，所以選擇向多個有本地辦學經驗嘅團體招手。

其中已經提交辦學意向書嘅，包括營辦港九華仁書院嘅天主教耶穌會、前港督衞奕信任校監嘅蘇格蘭阿伯丁大學及愛丁堡龍比亞大學合辦嘅私立大學。雖然佢哋未必係世界一流名牌大學，但相信學費至少係平民百姓可負擔嘅水平，唔似得有啲專為非富則貴子弟服務嘅辦學團體。

此外，由於皇后山地皮現時仍為爛地，附近乜嘢基建設施都未有，政府為咗吸引更多辦學團體加入競爭及提升營運水平，決定揹起該地皮附近基建設施嘅一切費用，好讓學校可以專心辦學。貪曾任內積極向權貴輸送利益，但估唔到佢嘅惡行禍連至新政府官員要步步為營，今次首當其衝就係教育局局長吳克儉，貪曾認真累人累物。