中環出更：劉詩昆鄧麗君音樂情緣
國際鋼琴大師劉詩昆愛徒侯小媛，日前以「小鄧麗君」身份喺文化中心與恩師孫穎舉行「處女個人騷」。劉詩昆專程由北京來港伴奏打氣，更大爆與鄧麗君相識經過。講起鄧麗君，劉詩昆語帶激動，拎住咪高峰嘅雙手都不禁顫抖，原來佢哋嘅緣分始於一九七九年。
鄧麗君嘅甜美歌聲，深深打動劉詩昆，可惜當年北京好保守，視呢類談情說愛嘅音樂為「黃色音樂」，莫講話收藏，就連聽吓都唔准。不過，劉詩昆唔理咁多，趁有次去美國表演，買咗張鄧麗君嘅黑膠碟，冒住被拉嘅危險，偷偷運返中國。「闖關」成功，原來全靠劉詩昆揸住本紅色外交護照，出入可以免檢查。
愛徒「小鄧麗君」港開騷
自此劉詩昆未有忘記鄧麗君，八十年代中，佢趁一次出國演出機會，喺新加坡約會對方，促膝詳談音樂。佢九○年來港定居後，見鄧麗君方便好多，有次兩人更傾到合作喺內地開演唱會，由佢擔任總監，可惜伊人走得太突然，心願未了。如今劉詩昆搵到愛徒延續鄧麗君嘅風采，難怪佢感動到想喊喇。