政情：白鴿區選難再高飛
沙田區議會田心選區前日舉行補選，以填補該區前議員劉江華出任政制及內地事務局副局長後嘅空缺，公民力量潘國山最終以二千四百幾票「超高票」重返區議會。儘管曾經臨陣「讓路」予劉江華參選嘅潘國山，被民主黨（白鴿黨）同人民力量聯手指佢離棄選民，但票數對比換屆不跌反升；反觀兩大泛民主派陣營嘅票數，加埋都唔及潘國山一半，可見白鴿黨面對內憂外患，隨時為下屆區選選情響起警鐘。
首先講吓今次泛民陣營選情，白鴿黨丁士元（丁仔）近年積極為劉慧卿辦事處服務田心居民，知名度不遜潘國山，更遠超人民力量林匡正。可惜丁仔最終低票大敗，得票率不及潘國山三成，就連「空降」田心嘅林匡正，單係過去兩月靠黨內星級陣容拉票，「零政績」下嘅票數依然與白鴿黨叮噹馬頭，反映白鴿黨欲以針對劉江華「用完即棄」嘅拉票策略不但無效，人民力量得票反而同白鴿黨平分秋色，不容小覷。
落敗賴晒「蛇齋餅糉」
相反，對比前年換屆選舉，莫講當時嘅民建聯劉江華以七成半得票率贏到開巷，今次潘國山亦只須喺選前稍為打吓告急牌，已即時動員二千四百幾人投票，更較劉江華高出八百幾票。所謂「爛船都有三斤釘」，可見建制派盤據田心選區多年，實力依然穩打穩紮，泛民陣營嘅任何一員依然插針都插唔入。
其實類似劇情，早喺去年沙田鞍泰選區補選經已預演一次，當時五人爭一席下，單係泛民已經有白鴿黨、新民主同盟及人民力量加入混戰，結果白鴿黨及新同盟因「鬼打鬼」被分薄票源下，雙雙高票落敗，可謂「贏粒糖、輸間廠」，民建聯新丁招文亮最終「漁人得利」，力保建制派議席不失。
新界東向來係泛民地盤，單係去年立法會選舉，九席之中亦穩奪六席，不過對比區選，兩者始終有別，白鴿黨與其將敗選罪名，推晒落建制派利用「蛇齋餅糉」籠絡選民身上，不如返屋企攝高枕頭諗清楚，點解每次選舉都出現鬼打鬼嘅內訌互撼，任由建制派執死雞好過啦。白鴿黨咁樣陰乾落去，前景真係一片黯淡o架。