中環出更：唔急搵真銀 黃靜文打Golf好逍遙
公認叻女兼人緣好嘅前政制及內地事務局副局長黃靜文（Adeline），自去年離開咗政府呢個「熱廚房」後，一直不乏獵頭公司垂青，Adeline都不為所動，話自己生活簡樸，之前份長糧經已足夠生活，唔急於搵真銀。早前一個周末，佢就同幾位波友齊齊到滘西洲公眾高爾夫球場切磋球技，過吓逍遙自在嘅大眾化生活。
已有十多年波齡嘅Adeline，當日一身運動裝、墨鏡加太陽帽整裝待發，打高爾夫球有姿勢又有實際。佢話十年前，同幾個老友柴娃娃去學打golf，點知初次接觸就深深迷上，最瘋狂時期，每星期會打兩、三次。佢笑言，高球啱晒佢呢啲冇乜運動細胞嘅人玩，最享受喺一片綠色草原上，邊打波邊同老友「吹水」，之後仲會一齊食飯，檢討彼此嘅不足之處。後來做咗副局長，就因公務繁忙而疏於練習，搞到成績一落千丈。所以Adeline趁住依家回復自由身，乘機重拾球桿，希望打番好啲波咁話。
不排除過檔廠商會
早前獵頭公司曾經搵佢做平等機會委員會主席，接替林煥光，但Adeline最終因顧及市民期望而婉拒咗。雖然無緣重返官場，但另一邊廂，據聞中華廠商聯合會行政總裁梁世華即將離任，商會正考慮搵佢過檔幫手。對此Adeline不置可否，仲話唔排除任何可能性，似有玄機喎。睇嚟Adeline唔單止打高球叻，連政治智慧都高人一等。
卓妮