政情：胡志偉當曾主席冇到？
尋日多個立法會議員辦事處開張，其中民主黨胡志偉辦事處開幕，排場可能最巴閉，負責「醫食住行」嘅局長都畀佢請晒，分別請咗食物及衞生局局長高永文同運輸及房屋局局長張炳良主禮，連立法會主席曾鈺成都畀面出席，可惜曾鈺成好似一度被遺忘咗，不過原來有原因嘅。
做咗咁多年區議員，終於有第一間立法會議員辦事處，志偉當然高興，尋日特登着番套西裝，梳番個靚頭賀一賀佢。張炳良話，識咗志偉十幾年，睇住對方由市政局議員到今日做咗立法會議員，當然戥佢開心，故平時「好少企街」嘅佢亦到場致賀。
300呎辦事處月租萬六
尋日單計主禮嘉賓都有十位，賀詞都要致十次，但主持一時忙亂，差啲遺忘曾鈺成，好彩呢位立法會主席最後獲安排「壓軸」致詞。但去到送紀念品環節，主席就再次無份。志偉後來同我哋講，其實佢全體立法會同僚都有邀請，無特別邀請曾鈺成，所以主席出現，志偉覺得好驚喜，但就係因為咁，無預紀念品畀佢。
嘉賓將位於鳳凰新村嘅辦事處擠得水洩不通，大家惟有企晒出街。唔講唔知，呢個舖位只有三百呎，月租竟然要萬六蚊o架。