十年前月入一萬元做個萬元戶叫做不過不失，基本上三餐無憂，如果十年後嘅今時今日仍然係月入一萬，你估情況會係點吖？情況梗係慘啦，事關十年通脹非同小可，百物騰貴再加上租金狂升，區區一個萬元戶真係搵朝唔得晚。
喂，睇下家陣嘅租金吖，就算遠離市區嘅新界，隨便一個三、四百呎豆腐膶單位都要月租八、九千元，打工仔每個月一萬元收入根本租唔起。功夫茶要講嘅係，一個人如果十年來收入毫無增長，的而且確係一件十分悲涼嘅事情。偏偏有人調查過，香港人向上流動嘅機會愈來愈少，好多人一直維持於低收入狀態，即使肯讀書有學歷都冇用。
點解會咁嘅呢？當然同政府施政有關啦。好似副學士咁吖，唔少中學畢業生雖然符合入讀大學嘅最低資格，不過學位有限，無奈之下被迫報讀副學士，仲要舉債繳付高昂學費。之不過問題係，副學士未必接駁得上大學，畢業之後投身社會求職打工咩，高不成低不就嘅學歷又未必得到廣泛承認。試問嘞，副學士有乜嘢向上流動嘅機會呢？
中文大學香港亞太研究所嘅調查發現，超過六成受訪市民認為，現時香港社會向上流動嘅機會較十年前差，大約五成半感到向上流動機會不足。近四成四受訪者估計，未來十年向上流動機會將會變差，認為變好嘅只有不足兩成。研究人員就認為嘞，政府應該設法增加社會向上流動嘅機會，減輕市民嘅不滿，藉此提高管治威信。
簡單咁講，香港有一半以上嘅人口覺得前景黯淡，升職唔使望，加薪唔使諗，如果想學似財爺曾俊華咁樣做一個「年薪四百萬嘅中產階級」，輪迴下世再投胎都未必能夠美夢成真。
社會難以向上流嘅原因，當然同施政水準向下流有關啦。以前嘅香港，只要肯讀書已經不愁溫飽，即使盲字唔識幾個，肯捱肯拚一樣養得起成頭家，獅子山下唔知幾多人靠穿膠花養到仔女肥肥白白兼且大學畢業。回歸之後嘅香港冇呢支歌仔唱，大學畢業唔代表高薪厚職，肯捱肯拚唔代表家肥屋潤，草根階層有幸唔失業，收入都係原地踏步十年不變。計功夫茶話齋，如果唔係官老爺將施政方針不斷向大商家傾斜，香港人都唔使為咗供樓交租而奔波勞碌到金睛火眼啦！
總而言之，冰凍三尺非一日之寒，民怨沸騰非一朝一夕，千祈唔好官逼民反！