著名華人導演李安無幾耐之前憑藉3D電影《少年PI的奇幻漂流》，再次獲選為奧斯卡最佳導演，佢獲獎之後多次感謝佢家鄉台灣嘅支持。
李安嘅獲獎再次刺激到香港電影業界嘅神經，群起炮轟港府未有積極協助佢哋拍戲，連想喺香港街頭攞景都諸多阻撓。不過有港府高層就話，電影業界提出嘅要求有啲實在好難做到，其中一個就係炸咗彌敦道！
呢位港府高層透露，當局接過海內外電影業界不只一次申請，要求喺彌敦道拍攝大型爆炸場面，貪彌敦道廣為海外遊客熟悉，而且條路夠長夠直又夠闊，搞爆破畫面同效果都一流。問題係彌敦道不論日夜都人多車多，一旦要封路搞爆破，勢必影響大量居民、遊客、商戶同交通，就算政府肯批市民亦未必支持。
其實香港都唔係無借過一啲著名地標畀電影業界拍戲，例如幾年前嘅《蝙蝠俠：黑夜之神》，港府就喺中區大範圍封路，以便對方拍攝蝙蝠俠由國金二期頂樓跳下嘅經典場面。拍呢齣戲由於影響無咁大，因而獲得批准。