九巴嚟緊十七日平均加價百分之四點九，激起民憤，至少三十七位即佔全體四十二位元朗區區議員嘅近九成議員，罕有地首次跨黨派集體杯葛九巴今日為佢哋搞嘅春茗，參與杯葛嘅包括身兼立法會議員嘅元朗區議會主席梁志祥、十八鄉鄉事委員會主席梁福元等。班區議員除咗抗議九巴大幅加價外，亦反對九巴借「區域性模式重組路線」及環保為名，「借啲意」削減巴士路線同班次。
聽聞九巴陸續宴請各區區議會春茗，今日輪到元朗區，但一班區議員尋日好高調咁聯署發新聞稿，話唔會出席，仲講到元朗天水圍區內嘅居民，並非低人一等，係唔會任由九巴魚肉而唔作出反抗，字裏行間流露出對九巴嘅怒火。
有份參與杯葛嘅李月民議員就話，往年一眾區議員都會畀面出席九巴春茗，但今年九巴加價加幅咁高，對搭長途巴士出去市區返工嘅元朗同天水圍基層居民嚟講，確係負擔。
佢收到風仲話，九巴將會削減部分路線如269M，又建議啲居民喺大欖隧道轉乘站轉車，講到呢度，佢即刻扯晒火：「叫啲居民一早起身轉來轉去，有冇搞錯！」九巴就話今日嘅春茗會如期舉行，又話元朗區重組路線仲係傾緊，未最後落實。