曾任保安局局長嘅新民黨主席葉劉淑儀早年離開特區政府後，一直有同佢啲前上司下屬保持聯繫，好似葉太最近就同首位華人保安司、前上司黎慶寧等人，宴請途經香港嘅英國高級外交官員胡克定（Chris Wood）食飯，據聞由於Chris有個習慣，每年年終時都會發電郵畀朋友報告全年行蹤、生活同工作調動等，所以過去十多年來都有保持聯絡。
葉太尋日喺社交網站上載最新飯局照片，見到兩名久未露面嘅前高官，包括黎慶寧同前資訊科技及廣播局局長鄺其志，另外同場出席飯局嘅仲有曾做過保安科、現任食環署署長梁卓文，原來佢哋約埋同Chris吃飯兼敍舊。至於Chris，葉太話，Chris喺港英政府做過助理政治顧問，當年有份參與有關香港從殖民地過渡成為特區準備工作。佢又話Chris係一個典型中國通，而且普通話好到不得了，最新任命係去台灣，擔任英國駐台北代表。
黎慶寧喺回歸後一年急流勇退唔做保安局局長，之後一直非常低調，好忍得口唔似其他退休高官咁月旦時事，今次喺網上所見，瘦骨精一樣嘅黎慶寧，竟然發福咗。