政情：洪為民兩招幫iProA洗底
互聯網專業協會（iProA）近年風雨飄搖，佢哋嘅新任會長洪為民（Witman） 就話，雖然之前大家對iProA有啲負面印象，但佢就覺得要洗底嘅話，與其做形象工程，不如做實事仲好。Witman仲喺就職典禮上引用咗《易經》當中一句「貞固、足以幹事」，話只要純正堅固，堅韌不拔，就必能成事，所以會集中精力為會員同業界做實事。
攻內地 助創業
iProA要洗底都唔係一時三刻可以成事，Witman話與其進行形象工程，不如做實事，皆因之前傳媒已大事報道佢哋嘅負面新聞，就算依家做幾多專訪去提升形象都冇人有興趣睇，所以不如專注會務工作，因為會員對協會有歸屬感，亦都可以改變社會睇法。
Witman又透露洗底兩招，第一招係短期內集中精力服務會員，佢哋已搞緊連串到內地參觀團，而且會同內地政府同同業聯絡，睇吓點樣可以開放市場畀港商投資，同幫港商爭取稅務優惠。而第二招就係吸引更多有心創業嘅年輕人入會，介紹啲中小企畀佢哋識，等佢哋有多啲發展機會喎。