政情：梁繼昌爭連任最忌雙妹嘜
外國政界有句名言，一場選舉嘅結束，就標誌下一場選戰嘅開始。公共專業聯盟成員梁繼昌（Kenneth）喺去年嘅立法會會計界功能界別選舉中，以唔夠過半數票「爆冷」當選，爭取連任嘅壓力同危機自然特別高。不過據聞佢並非擔心上屆選舉嘅主要對手、代表建制派嘅林智遠捲土重來，而係最驚建制派會改派兩名女將麥嘉軒或者趙麗娟出戰。
上屆會計界選舉，各方最初都看好獲前會計界議員陳茂波（阿Paul）支持嘅林智遠可順利當選，不過喺選舉關鍵時刻，阿Paul因為加入政府出任發展局局長，為咗保持政治中立而未能全力為林智遠拉票，加上阿Paul其後爆出嘅劏房風波，多少影響到林智遠嘅形象，最終都由Kenneth勝出。
去年僅取四成七票當選
不過，Kenneth最後僅取得七千七百多票，佔總投票人數嘅四成七，唔算壓倒性當選。如果建制派換過一位形象新鮮、親政府色彩較淡嘅會計師參選，Kenneth想連任就唔係咁易。
據聞Kenneth最驚面對嘅對手喺兩個女人，第一個係屬於「唐營」嘅靚女會計師麥嘉軒，一來如果佢參選，肯定會獲得胡定旭等「唐營」會計界人士力撐；二來佢老公中大前校長兼前行政會議成員劉遵義，喺政、商、學界都具一定影響力；三來眾所周知麥嘉軒係「哥哥」張國榮嘅外甥女，本身又係混血兒，外表吸引又叻女，喺年輕選民愈嚟愈多嘅會計界有一定吸票能力。不過據知麥嘉軒本身嘅從政意欲不大，有人喺年多前問過佢會否取代林智遠參選，佢諗都無諗就耍手擰頭。
Kenneth另一個潛在有力對手，就係現任、亦係首位女性會計師公會會長趙麗娟。趙麗娟前年參選選委會時獲阿Paul力撐，被外界視為「梁粉」一員，但其實佢同「唐營」會計界關係亦唔差，係比較中性嘅建制派人選，並且有掌管過會計師公會嘅優勢，不過就唔知佢係咪有意棄商從政、瞓身參選。