中環出更：吳永嘉為工展獻「第一次」
廠商會嘅工展小姐已成為家喻戶曉生招牌。廠商會下月尾會喺廈門舉辦首屆工展小姐選美，參賽嘅當然係神州佳麗。廠商會展覽服務有限公司主席吳永嘉（Jimmy）一於獻出「第一次」，擔任評判揀靚女。
工展小姐向來形象密實，甚少「露肉」鬥靚，今次去到神州，Jimmy話要令人眼前一亮，首次引入泳裝環節。但一眾佳麗唔會着「三點式」亮相，保證唔會走光，據聞有泳衣廠商已計劃好晒款式。Jimmy笑言，但凡參加選美入圍的女仔，履歷上就增添光環，對將來搵工好大幫助。廠商會並會成人之美，安排勝出嘅廈門工展小姐九月來港出席「香港食品嘉年華」，仲有年尾舉行嘅維園工展會，唔怪得咁多人參加。
手機藏陳年「肉照」
噱頭咁新鮮，Jimmy話稍後喺內地其他省市搞埋「工展選美」。其實Jimmy本人就夠晒條件參加「工展猛男」，佢展示手機內一張「肉照」，攝於當年入讀港大法律系嘅迎新營，相中嘅佢「露兩點」扮盜賊，事隔廿幾年，仍然「童顏」一張，莫非佢打咗防腐劑！？