大家有冇發覺，家陣行街街已經變得冇厘味道？部分新市鎮仲可悲，連街都冇得你行，要行就行千篇一律得嚟又冷氣凍到你騰騰震嘅商場。以前行街街，無論係大街定係小巷都好鬼死過癮o架，十間店舖有十種風格，呢間賣新潮貨，嗰間賣老餅嘢，再行多兩步甚至見到古靈精怪嘅情趣用品，搞搞震冇幫襯都可以消磨時間偷得浮生半日閒。
家陣行街街咯喎，索然無味嘅意思係國際名牌連鎖店林立，莫講話銅鑼灣同尖沙咀冇乜大分別，即使你走到去台北甚至紐約，望落去都係熟口熟面，而且共通點係愈來愈多簡體字歡迎源源不絕嘅國內同胞盡情消費。
香港嘅街道失去咗原本嘅特色，其中一大原因係租金愈來愈貴，而且係貴到得人驚嗰隻，負擔唔起嘅小商舖迫於無奈執笠大吉，或者下屋搬上屋經營樓上舖，貪佢租金相對便宜少少。舖租貴到冇朋友，加租又加到發晒狂，除咗國際名牌連鎖店之外真係冇乜邊個租得起。
去年十月政府為咗遏抑住宅樓市炒風，推出買家印花稅以及加強額外印花稅，炒家雖然縮咗一縮，不過好快就轉攻唔受影響嘅舖位。你知啦，舖位一經炒賣就水漲船高o架啦，連帶搞到舖租都直線上升。喺咁嘅情況之下，試問營營役役嘅小商戶點樣頂得住吖？於是乎砰砰嘭嘭執下又一間，執下又一間，執到人去樓空，執到水盡鵝飛。
唔講大家可能唔知，香港嘅黃金地段例如銅鑼灣謝斐道、灣仔皇后大道東、尖沙咀以及俗稱金魚街嘅旺角通菜街地段，總共大約出現咗四百五十間吉舖，大部分都係瘋狂舖租嘅犧牲品。喂，灣仔莊士敦道有一間舖呀，月租由二十五萬加到六十萬，加幅一倍都唔止，點捱呀！
簡單咁講，炒舖潮炒到小商戶冇啖好食，同時炒到香港面目全非，原本賣傳統美食嘅港式舊店舖，一個屈尾十隨時變咗金碧輝煌賣首飾，乜嘢風味都變質啦。
講來講去咪又係香港嘅房地產政策有問題囉，官老爺一味向地產商傾斜，賺到眉開眼笑嘅十大富豪冇一個同地產無關。喺咁嘅情況之下，所有店舖老闆基本上都係同地產商打工o架咋。
所以話啫，特區政府除咗遏抑住宅炒風之外，亦有必要遏抑商舖炒風，至少唔好趕絕小本經營者吖嘛。冇錯，最近政府將稅務辣招嘅矛頭指向非住宅物業，令到炒家嘅成本增加不少，之但係力度夠唔夠呢？唔該財爺曾俊華絞盡腦汁諗一諗啦，千祈唔好學似預算案咁餐餐計錯數！