古老嘅格言說：孩子和傻子永遠說真話。由○七年開始出任財政司司長嘅曾俊華，今年嘅財政預算案係佢嘅第六份，亦係ＣＹ新政府上台嘅首份財政預算案；內容完全有迹可尋，新思維完全欠奉，本報「正論」十四字題講晒：「派糖一味抄舊橋，預算年年狼來了」！
鬍鬚曾唔係𡃁仔，更加唔係傻子，而係一個年薪逾四百萬，月入超過三十萬，住官邸有司機嘅「中產」，年年狼來了，年年講假話，證明佢唔係傻子！
所以，呢位中產財爺做財政預算案好似藥材舖執藥嘅掌櫃，只要喺百幾個櫃桶，「毫不猶豫」地每個櫃執一啲，東拼拼西湊湊，一份流水帳嘅「財政預算」就搞掂喇！是以佢再做多幾年財爺，牛頭角順嫂、灣仔賣魚盛，唔使佢宣讀，一早都知道政府「一次性」派糖係乜東東芫荽葱！鬍鬚曾「降呢」做咗「中產」後，香港嘅中產已經被「滅族」消音，試問一睜開眼就有萬多元收入嘅「中產」，除了鬍鬚曾仲有邊一位啊？
今後老朽如果斗膽話自己係「中產」，肯定畀人剷到褲都甩，如果自認中產者，只能有一個鬍鬚曾做朋友，若然你認為人生得一知己，死而無憾，咁老朽都阻止唔到你，由得你同史上最叻嘅魔術師（年年估赤字都變可觀盈餘）鬍鬚曾合唱《天各一方》好了！你有你嘅夢想，我有我嘅蝦碌！
鬍鬚曾呢位人人皆眼紅嘅「中產」財爺，老朽欣羨之餘，敬錄晚清流行的一首《一剪梅》下半闋賀佢「看似中產，更勝中產」：「八方無事歲年年，國運方隆，官運方通，大家贊襄要和衷，好也彌縫，歹也彌縫。無災無難到三公，妻受榮封，子蔭郎中；流芳萬世更無窮，不諡文忠，便諡文恭。」當然，鬍鬚曾大可諡「財忠」！