香港部分店舖同食肆，經常被投訴針對內地同胞「劏客」屈錢，但有香港政商界人士爆料，話個別喺北京嘅飯店，專揀人大政協兩會召開期間，明屈啲來自香港區嘅人大代表同政協委員，手法仲好狼胎。
一餐飯40萬人仔埋單
話說喺某年兩會期間，一批港區人大政協到北京某間飯店食飯，期間撞到另一批港區人大政協，雙方寒暄一輪，決定互請對方食飯，點知埋單時飯店竟然獅子開大口，話要成四十萬人仔！好彩負責埋單嘅全國政協喺內地打滾多年，知道點樣應付，立即同侍應講佢哋最多只會畀三萬元，唔收就算，對方果然粒聲唔出照收。
呢位政協之後問番答應幫佢哋埋單嗰批人大政協，發現飯店又係要佢哋畀四十萬元，最慘係對方經驗不足，居然照畀。雖然做得人大政協，就算唔係非富則貴，都係有頭有面，唔會畀唔起錢食貴嘢，但無喇喇被人劏一筆，始終係唔順氣囉。
有人大政協又透露，其中一間最近港區人大政協入住酒店嘅飯店，出晒名「劏客」劏得好狼，除咗冇人教路嘅新仔之外，幾乎冇港區人大政協會幫襯。依家佢哋上到去請客食飯，多數會揀由香港賽馬會喺北京經營嘅會所，或者揀啲知名五星級酒店餐廳，貪佢哋明碼實價，貴極有個譜，唔會荷包受苦自己又受氣。