政情：今日你上鏡：夠晒體貼

前日財爺到立法會發表財政預算案前夕，一眾局長已喺會議廳等候，但事後我哋就發現有個得意嘅畫面，就係政制及內地事務局局長譚志源主動幫坐喺前面嘅財經事務及庫務局局長陳家強整理西裝後領，之後陳家強亦都好有禮貌咁擰轉頭講聲唔該。點解譚志源會咁眼利？睇番成份預算案，幾乎所有措施都唔關政制局事，加上選舉年剛過，新政改方案又冇咁快出爐，橫掂譚志源冇乜嘢做，咪做住阿四幫手執頭執尾，幫陳家強整理吓西裝囉！