政情：「官場奶媽」激瘦背後 林鄭血糖偏高
政務司司長林鄭月娥嘅「官場奶媽」形象深入民心，上任初期先帶住教育局局長吳克儉拆解國民教育風波嘅炸彈，之後再率領一眾局長諗計擊退水貨客。不過，林鄭尋日請傳媒去佢山頂白加道官邸聚會時話，佢嘅「奶媽」形象之所以深入民心，都只因大家先入為主啫，其實佢都好耐冇同某一個局長喺公開場合出現喇！
正跟陳念慈學打波
林鄭上任初期爆出一句「度日如年」，唔少人都戥佢可憐，林鄭尋日就好欣慰話，政府埋位八個月大體施政穩定，好多局長都努力工作，又經常同傳媒聚會。佢仲話，自己個性率直，以往唔會句句說話都秤過先講，但自從做咗司長之後先至發現，原來自己講嘅每隻字都好易被人放大，所以都係秤吓先講會安全啲，以免被人誤會。
林鄭做咗司長後瘦咗一個圈，但原來她苗條背後卻血糖偏高，醫生仲叫佢要注意飲食，食少啲碳水化合物，但林鄭就推薦記者一定要試番件官邸廚房招牌點心馬拉糕，佢亦忍唔住淺嘗一件。不過唔緊要，因為林鄭不時都打羽毛球，波友就係前港隊代表陳念慈，林鄭話只係跟陳念慈學打波，但因為太忙，有時一星期都未必打到一次喎。