政情：李國麟嫁入公專聯
今屆立法會已開鑼五個多月，新一輪政黨政團整合亦暗地裏展開，消息指公共專業聯盟（公專聯）率先跑出，議員數目有望由二變三，衞生服務界李國麟將嫁入公專聯，聯同資訊科技界莫乃光及會計界梁繼昌拍住上。至於以工業界議員梁君彥為首嘅立法會七人組，據聞亦積極四出招攬人才，可惜未有新議員加盟，尋日更慘食檸檬。
公專聯莫乃光同梁繼昌去年勝選成功殺入立法會後，一直密謀擴充版圖，四出物色泛民主派獨立議員加盟，當中包括李國麟同教育界葉建源。據聞公專聯落足嘴頭多時，李國麟終被打動，目前只欠向所屬嘅香港護士協會交代，如冇乜阻力就有待擇日公布。
消息話，泛民多年來都有意無意邊緣化李國麟，已單打獨鬥多時嘅李國麟，呢次搵到同樣相對溫和嘅公專聯埋堆，喺協同效應下絕對係好處多於壞處，連帶公專聯將來同政府討價還價嘅能力亦有增無減。
教協葉建源按兵不動
至於葉建源嘅去向，據聞短期內都冇乜可能加入公專聯，事關葉建源本身係教協嘅人，非但不能話事，相反有乜舉措都要教協同意，加上教協一直蠢蠢欲動想喺未來選舉打正旗號參選，所以葉建源一動不如一靜都係有原因嘅。
另一擴充在望嘅就係梁君彥為首嘅立法會七人組，七人走埋一齊後備受外間關注，每隔一段時間都有政經猛人加盟，最新加盟嘅係鄉議局主席劉皇發嘅兒子劉業強，聽聞未來更有可能有一至兩名議員加盟添。
旅遊界姚思榮保獨立
眾所周知，目前保持獨立身份嘅建制派議員數目不多，數來數去只有旅遊界姚思榮同建築、測量及都市規劃界謝偉銓，早前更有消息話姚思榮好大機會埋梁君彥堆。不過，姚思榮尋日接受查詢時疑似推翻呢個傳聞，佢話傾向保留獨立議員身份，又自爆同金融界吳亮星等人較熟落喎，唔知佢係咪早已心有所屬呢？