中環出更：何鍾泰元宵佳節 陪朋友購物
立法會前工程界議員何鍾泰（Raymond），過去十多年議員生涯中甚少帶同家人出席公開場合，連帶佢嘅家庭生活都諱莫如深。還記得Raymond講過，佢在任議員時勤力到連農曆大年初一都會返立法會工作，但喺剛過去嘅元宵節傍晚，卓妮就見到Raymond陪同一對疑似母女嘅女士，於金鐘太古廣場一間時裝店買手袋。
當兩位女士進入店內細心選購貨品時，Raymond則在店外，頭耷耷把玩智能手機，似係對於購物冇興趣，但又不時抬頭察望店內情況，儼如一家之主耐心等候家人購物嘅模樣。
現致力政策研究
當卓妮上前同Raymond打個招呼，問吓佢點解唔一齊入店舖時，佢就話只係陪同朋友購物，趁空閒透過手機閱讀一啲研究報告喎。
Raymond又話，雖然佢失去立法會議席，但唔代表從此清閒，仍然致力政策研究以期喺議會之外繼續服務港人咁話。不過，Raymond一直醉心工作，由朝做到晚，年中無休，估唔到卸任之後仍然忙得不可開交，就連假日都要抽時間陪朋友購物，睇嚟Raymond都係重友情之人，十分難得。
卓妮