【本報訊】財政司司長曾俊華昨再為自己「冒認」中產辯護，聲稱「中產」一詞並非由薪酬定義，而是一種生活風格，並引述文章指愛飲咖啡、愛看法國電影的便是中產，而他自己亦愛飲茶及看電影，故可以中產自居，拒絕收回言論。但多名致電電台的市民和網民表示不接受其中產定義，質疑若年薪逾四百萬元的曾俊華也屬中產，「咁全港大部分人都要你扶貧啦！」
新一份預算案被指漠視中產階層，曾俊華前日在記者會被問及是否明白中產苦況時，竟自稱他也是中產一員，激起一眾「真中產」憤怒。
曾俊華昨於電台論壇解釋，自己於中產家庭成長，大學畢業後與妻子都是專業人士，無論於美國或中國均是中產人士。他又說：「（中產）其實係一個lifestyle（生活風格），我睇過有文章話，啲人飲咖啡係中產，又或者係鍾意法國電影嘅人係中產。我喜歡睇電影、飲吓茶，同大家中產生活上無咩大分別。」
有電台聽眾炮轟曾俊華的說法「老土」，指曾俊華高薪厚職，若他也屬於中產階層，「咁全港大部分人都要你扶貧啦！」有聽眾認為月入萬多兩萬元才有資格叫中產，批評曾俊華不理解中產苦況。有網民則指，草根階層或大商家都可以喜歡飲咖啡和看法國電影，所以不可視作成為中產的條件。有網民更透過改圖，揶揄曾俊華口中的「中產」，其實是指「中國生產」，那麼所有在中國出生的香港人都可自稱「中產」。
陳女士：你直接派錢先可以幫到我哋。我哋月入萬幾蚊，豪又豪唔得起，窮又唔窮到碌地，我哋連飲茶都唔敢星期六、日去，多一百蚊就一百蚊。
陳先生：曾司長你咁多屆都估錯數，你係咪應該鞠躬下台辭職，對政府負責？注資一百五十億畀再培訓局，圖利嘅只係政黨，你點監察先？
黃先生：我哋先係真中產，每月得萬幾兩萬蚊人工，仲要交水電煤。財爺你好老土，薪高厚職仲話自己中產。
林太：我唔叫你司長，因為你未夠班。你幾百萬年薪都係中產，全港大部分人都需要你扶貧啦？
羅先生：逢公屋人士你就幫佢交兩個月租，我哋租緊私樓，邊個幫我哋交租？我哋都合資格住公屋，只係未輪到。
林生：我本身係退休中產，現時通脹咁犀利，我哋乜都無，只有食穀種，慘過拎綜援。
潘先生：對你好失望，我哋啲錢係用嚟建設，唔係用嚟退、唔係用嚟派。
陳先生：我係你頭號粉絲，你唔使理其他人講，新意其實無意思，真係要務實至得，長期派糖唔係辦法。