郵箱玻璃破爛貼紙了事
天水圍居民黎先生發現，位於天瑞商場地下的郵箱頂部玻璃損毀多時，原張貼於玻璃表面的收信時間表亦受破壞而無法閱讀，卻一直未見有人維修，僅補貼新時間表了事，「啲爛玻璃喺正頭頂，高啲都中招，佢哋就咁貼張新時間表就算，又唔整番佢，陣間跌落嚟整親人點算？」
《東方》介入始維修
香港郵政發言人接獲轉介後，僅口頭回覆指相關郵箱由房屋署管理。房署發言人表示，有關郵箱由天瑞邨辦事處負責管理及維修，接獲香港郵政轉介郵箱的損毀通知後，已經即時派員跟進，當日早上已清理破損玻璃，並於一星期後完成維修。
「貼得新時間表出嚟，就冇理由唔知道塊玻璃爛咗，但就要同《東方》投訴完先捨得整，真係完全唔踢唔郁！」黎先生直指當局拖延維修設施，有罔顧市民安全之嫌。